07 澳門煙花團

每年9-10月，都係澳門國際煙花比賽匯演。今年已經係第十九屆，亦都係第四年去影煙花。

今年約埋幾個朋友，一齊遠征澳門。哈哈~

第一日（29號）到達後先食lunch，之後去大三巴行下玩具店，等另一個朋友到達一齊去食dinner。

去左間叫坤記的葡國菜館。正！豬柳、雞、咖喱。

晚飯後就搵車坐去海洋花園，因為太早到，去左間OK便利店，入面竟然有個休憩區。於是我地就坐晒係入面等時間過。其間又撞到另一個朋友。哈~ 真係有緣。等到差唔多時間就去海邊搵位。

第一場係美國，一般。用作試setting。哈~~ 影得30張，最後得8張見得人。

第二場係日本，正。哈~ 有一幕係一粒一粒咁放，真係好似專為你地影相而設咁。影左60張，最後得17張見得人。

影完煙花，例牌又係要四圍去搵的士。返到酒店，稍作休息，再度出發。去賭場…

有兩個爛賭婆，係金沙度糾纏左三個幾鐘，最後嬴得幾百蚊…企到我地腳到軟。

第二日（30號）因為之前一晚企得太耐，累得到死，訓到十一點半先起身。浪費左一個早上。嗚~~ 中午checkout後，去左八佰伴地下果間Angela's Cafe食lunch。之後去禮記食雪糕。再應兩個爛賭婆要求，去左威尼斯人影相。

威尼斯人，交通真係幾煩。去，要甩一段路先可以入到酒店。走，相信要排一個鐘先有車走。入到去，的確係幾靚，d 裝修真係不得了。淨係天花果d 畫，都玩左我地成個鐘。跟住去商場同埋果幾條"渠"。個人覺得個商場又唔係好大。行左兩個區，來來去去都係果個景，好悶。隻船仔原來係電船仔，有d 覺得搵笨。最後因為唔想企係度等成個鐘的士，所以選擇左行去官也街。

原來唔係好遠，行四五個字就到。收左太陽，有d 風，幾舒服。仲快過等車。呵~~

買埋手信，食埋飯就坐車去碼頭上船返歸，結朿今年澳門煙花之旅。

美國隊煙花︰http://gallery.chuenhk.com/v/travel/macaufireworks07_us/
日本隊煙花︰ http://gallery.chuenhk.com/v/travel/macaufireworks07_jp/
澳門之旅07︰http://gallery.chuenhk.com/v/travel/macau0709/